سنة 2007

ربنا يجعلك هادية و مهدية ونادية و مندية -و سنة 2006 والله كتر خيرك-بالرغم من طول لياليكى و كل العياط اللى حصل فيكى و كل حرقة الدم و كل الناس اللى بانوا على حقيقتهم فيكى-و بالرغم من كل اللى حصل على المستوى اللوكال و الانترناشيونال-بجد انا فيكى اتعلمت كتير,انا عينايا فتحت فيكى اوى لدرجة انى لابسة نضارة دلوقتى-بس عشان البى سى مش اكتر-انا فيكى شفت ناس حلوة اوى ,غيروا فيا كتير و زودوا حاجات حلوة فيا و صحوا حاجات فيا ماتت مع دبت اول مشرط فى جسم اول عيان جه تحت ايدى-و مع كل بنى ادم يارب انتى جبتوا تحت ايدى او فى الطوارئ و انت شاهد على عدم وجود اكويبمنت عشان ننقذه و انت العالم اننا بنغزل برجل حمارو بالرغم من كده انا مستسلمتش و كملت و انقذت الراجل اللى كان عامل عملية و الجرح كان نضيف بس العيان جه فى كوما و انت العالم ازاى انا فتحت بقه عشان اشم الاسيتون-و بالرغم من وجود 4 ستات متشرحين على السراير اللى جنبه-انت خليتنى اركز و اشخص ديابيتك كوما و انقذه-و انت اللى ساعدتنى فى علاج حسن بالرغم من زعيقى فى امه اللى اهمالها كان السبب فى كسر البونز اللى فى رقبته-و مع كل دمعة انا مسكتها قدام طلبة الامتياز عشان ابقى قوية قدامهم و اللى ظهرت على حقيقتى قدامهم لما الاب شال ابنه اللى مات و حطه على كتفه و ابتدى يعيط فى سكوت من عينه اليمين عشان الشمال كانت ضايعة بقالها كذا سنة و الولد الميت كأنه حس بأبوه فلما حطه ابوه على كتفه-الولد و هو ميت حط راسه على صدر ابوه كأنه بيحتمى بأبوه و بيقولوه متعيطش يا بابا انا اهوه لسه فى حضنك بس انا مت و لازم اروح لربنا معلش يا بابا انا عارف ان تكاليفى كانت كتير بس ادينى فاضلى شوية مصاريف بسيطة و ماشى اصبر يا بابا و انا مش داخل الجنة اللا بيك انت و ماما-و مع كل طالب امتياز استفاد من الشيفت بتاعى -و مع كل فطار فى رمضان اتأخر عشان الطوارئ-و مع عدم وضع امضتى اللا على شهادة حق فى اى تحقيق -و عدم وضعها على الموافقة على دخول اكويبمنت مش مضمونة-و مع محاولاتى المستميتة انى اكل لقمة حلال و اراعى حقك انت بس-بأقدم كل ده و انت عارف انى بأقدم اكتر-كل ده ليك انت-بأحطه قدامك يا رب و بأطلب منك انك تزيد من علمى و تهدينى و تحمينى و تخلينى مع كل الشقلبظات اللى بأعملها انى اعمل كل اللى نفسى فيه و اوصل للى اتمناه و انت المستعان على دى البلان-(بلان دى يا شباب يعنى خطة-و طالما السوات اناليزيز مش نافع فى المستشفى يبقى اطبقه فى حياتى)-و بأقول للولد الصغير اللى صاحبته فى سعودى-خليك حلو كده على طول و ربنا يحميك ,ما شاء الله بتشترى لحمه العيد لوحدك؟بس كويس انك ضحكت لما لسانى اتعوج و ردحت للايطالية اللى كانت عاوزة تاخد دورى انا و انت-مش كفاية بنك اسكندرية؟